Fjölskyldur trans barna og ungmenna eru í uppnámi vegna niðurskurðar á Barna- og unglingageðdeild Landspítalans, BUGL. Frá áramótum hefur ekki verið hægt að halda úti trans-teymi, sem gegnir því lykilhlutverki að gera trans ungmennum kleift að komast á lyf vegna hormónastarfsemi, þegar kynþroski knýr dyra. Þetta gengur þvert á ný lög um kynrænt sjálfræði. „Það er bara verið að ala upp fleiri sjúklinga með þessu,“ segir foreldri trans stúlku um þá stöðu sem upp er komin. Dæmi eru um að foreldrar hafi þurft að sitja yfir börnum sínum vegna þunglyndis, átröskunar eða sjálfsvígshættu.
Þrjár mæður trans stúlkna segja að fréttirnar hafi verið mikið áfall fyrir ungmennin og fjölskyldur þeirra, en 48 trans börn og ungmenni nýta sér þjónustu BUGL. Það er tíundi hluti skjólstæðinga deildarinnar.
„Það eru rosalega mörg börn að keppa við tímann vegna kynþroskans. Sumir foreldrar hafa þurft að vakta börnin sín vegna þunglyndis, átraskana eða sjálfsvígshættu,“ segir viðmælandi Mannlífs.
Lestu viðtalið við mæðurnar þrjár í Mannlífi sem kemur út á morgun.