Mannlíf hefur valið nokkur af betri ummælum vikunnar.
„Nú er svo komið að pólitísk rétthugsun, sem er bara annað nafn á fasisma, streymir um hinn frjálsa heim. Og sem fyrr eru háskólarnir fremstir í flokki. Við búum við eins konar McCarthy-isma vinstri manna í dag.“
Brynjar Níelsson, þingmaður Sjálfstæðisflokksins.
„Þetta hamfarafyllirí sem fjölmiðlar eru á veldur kvíða hjá fólki og sérstaklega kvíða hjá börnum.“
Óttar Guðmundsson geðlæknir um umfjöllun íslenskra fjölmiðla af kórónaveirunni.
„Ef ráðlegging til fjölskyldu sem hefur bókað fokdýra skíðaferð til Norður-Ítalíu er að fara ekki, þá þarf að segja það hreint út; ekki láta duga að hvetja til að sleppa „ónauðsynlegum“ ferðum.“
Þórir Guðmundsson, fréttastjóri Stöðvar 2, segir viðbrögð yfirvalda við útbreiðslu kórónaveirunnar vera fálmkennd.
„Djöfull er ég pirruð! Auðvitað þurftum við bara að bíða eftir að smit bærist til landsins. Sorrí, en ég vil helst bara loka landinu asap.“
Ágústa Eva Erlendsdóttir leikkona.
„Hér á landi hafa dyrnar fyrir smit inn í landið staðið galopnar. Áherslan lögð á að byrgja brunninn eftir að við værum dottin ofan í hann.“
Inga Sæland, formaður Flokks fólksins.
„Það væri hægt að karpa um túlkanir og rangfærslur út í hið óendanlega.“
Guðmundur Gunnarsson, fyrrverandi bæjarstjóri Ísafjarðar, um viðbrögð Daníels Jakobssonar og meirihlutans í bæjarstjórn Ísafjarðar við frásögn Guðmundar í síðasta tölublaði Mannlífs. Þar sagðist Guðmundur sjálfur hafa uppgötvað að ekki hafi verið leitað að stjórnanda þegar ráðið var í stöðuna. „Það var verið að leita að strengjabrúðu,“ sagði hann.
„Ég ætla að leggja það til við forsætisráðherra að refsing þín fyrir þessar áætlanir, Áslaug Arna, verði sú að þú sért skikkuð til þess að vinna eina viku á Vogi, sitja þar fundi og anda að þér angistinni hyldjúpu sem fylgir þeim sem eru að takast á við alvarlegan alkóhólisma og aðra fíknisjúkdóma.“
Kári Stefánsson, forstjóri Íslenskrar erfðagreiningar, er ekki par hrifinn af áfengisfrumvarpi dómsmálaráðherra.
„Það þarf því ekki mikla spádómsgáfu til að spá því að sósíalistar muni hafa afgerandi áhrif á næstu kosningar, hvenær svo sem ríkisstjórnin þorir að boða til þeirra.“
Gunnar Smári Egilsson sósíalistaforingi, vígreifur eftir að í ljós kom að Sósíalistaflokkurinn hefur bætt við sig fylgi, samkvæmt könnun Gallup.
„Þetta er óvirðing við hlustendur.“
Eiríkur Rögnvaldsson, prófessor emeritus í íslenskri málfræði, er ósáttur við enskuslettur kynnanna í úrslitakeppni Söngvakeppninnar.