Eins og greint hefur verið frá er Guðni Már Henningsson, fyrrum útvarpsmaður, myndlistamaður, ljóðskáld og rithöfundur látinn. Hann lést á Tenerife, þar sem hann hafði búið síðustu ár.
Guðni var ötult skáld og hafði gefið út bækur og ljóðabækur. Á Tenerife opnaði hann einnig myndlistasýningu og sat við skrif flesta daga. Árið 2019 gaf hann út bókina Römblusögur, um mannlífið á uppáhaldssvæði hans í höfuðborg Tenerife. Um búsetuna á eyjunni sagði Guðni: „Hér vil ég vera það sem eftir er.“
Eftirfarandi er frumsamið ljóð sem Guðni heitinn birti á Facebook þann 24. september síðastliðinn. Blessuð sé minning hans.
Veður
hér er þungur himinn
og þrútinn
hægari vindur
norðantil
en spáin þokkaleg á
heimamiðum
heiðskýrt fyrir norðan
í afskiptaleysinu
lognið vandfundið
í skjóli skáldmenna
munu áttirnar mætast
seint og um síðir
Það er farið að skyggja
og ég færi þitt dökka
hár
frá luktum augum
þínum
og ég kyssi alla
draumana
kveðjukossi
held síðan út í veður
og vind