- Auglýsing -
Ekki verður skipaður nýr ráðherra í dómsmálaráðuneytið í stað Sigríðar Andersen sem sagði af sér embætti í gær. Þess í stað mun Þordís Kolbrún Reykfjörð Gylfadóttir, ráðherra ferðamála, iðnaðar og nýsköpunar, taka tímabundið við verkefnum hennar.
Bjarni Benediktsson, formaður Sjálfstæðisflokksins, tilkynnti þetta að loknum þingflokksfundi á Alþingi nú fyrir stundu.
Bjarni sagði að um tímabundna ráðstöfun væri að ræða til að bregðast við þeirri stöðu sem kom upp í gær við afsögn Sigríðar. Framhaldið verði metið með þingflokknum á næstu vikum samhliða því að skipta þarf verkum upp á nýtt í þingflokknum.
Þórdís Kolbrún þekkir vil til mála í dómsmálaráðuneytinu, hún er lögfræðingur að mennt og var áður aðstoðarmaður Ólafar Nordal þegar hún var ráðherra.
Aðspurður sagðist Bjarni ekki sjá fyrir sér að Sigríður snúi aftur í ríkisstjórn á næstu vikum en það geti vel orðið síðar á kjörtímabilinu.