Þorgerður Katrín og fjölskylda komin í sóttkví

Þorgerður Katrín Gunnarsdóttir, þingmaður og formaður Viðreisnar, er komin í sóttkví vegna COVID-19 kórónuveirunnar.

Þorgerður Katrín greinir frá í færslu á Facebook og segir að fjölskylda hennar sé öll komin í sóttkví, þar á meðal móðir hennar á tíræðisaldri.

„Það er ekkert annað í stöðunni en að taka þessu alvarlega og fara að fyrirmælum sóttvarnateymisins. Þetta er fúlasta alvara. Pössum upp á fólkið okkar, elsku vinir, og gerum þetta rétt. Því lífið heldur áfram,“ skrifar Þorgerður Katrín.