Hinn skeleggi þingmaður Pírata, Þórhildur Sunna Ævarsdóttir og unnusti hennar, Rafal Orpel eignuðust heilbrigðan son rétt fyrir miðnætti í gærkvöldi. Drengurinn hefur þegar fengið nafn og heitir Antoni Örn Orpel.
Fæðingin gekk eins og í sögu og segir Þórhildur Sunna að Antoni hafi legið nokkuð á að komast í heiminn. Þá heilsast móður og barni vel og eru foreldrarnir himinlifandi og ástfangin.
Þórhildur greinir frá þessum miklu gleðitíðindum fjölskyldunnar á samfélagsmiðlum.
„Drengur er fæddur.
Antoni Örn Orpel kom á fleygiferð í heiminn rétt fyrir miðnætti í gær. Antoni fæddist heima hjá sér og hefur haft það náðugt með okkur yfir sig ástföngnum foreldrunum síðan. Okkur mæðginum heilast vel. Allt er eins og það á að vera,“
segir Þórhildur Sunna fyrir hönd foreldranna á Facebook fyrr í kvöld og hefur parið vart undan að taka við hamingjuóskum sem rigna yfir parið á síðu Þórhildar Sunnu.