Í hverju tölublaði tiltekur Mannlíf þá aðila sem átt hafa góða viku og slæma viku. Að þessu sinni er það Ragnar Kjartansson annars vegar og Þórólfur Árnason hinsvegar sem eru hinir útnefndu.
Góð vika- Ragnar Kjartansson, listamaður
Viðskiptamaðurinn Helgi Magnússon skipaði sér í flokk helstu fjölmiðlamógúla landsins þegar hann keypti helmingshlut í Fréttablaðinu. Helgi hefur áður verið viðloðandi sjónvarpsstöðina Hringbraut auk þess að vera einn af helstu bakhjörlum Viðreisnar. Fingraför hans eru strax farin að sjást því eitt hans fyrsta verk var að ráða ritstjóra með enga fjölmiðlareynslu. En bestu vikuna átti án efa listamaðurinn Ragnar Kjartansson sem heldur áfram að gera það gott úti í hinum stóra heimi. Mynd hans prýddi í vikunni framhlið hins fræga Metropolitan-safns í New York þar sem verk hans verða til sýnis næstu mánuði.
Slæm vika- Þórólfur Árnason, forstjóri Samgöngustofu
Þrátt fyrir að hafa gegnt embætti forstjóra Samgöngustofu undanfarin fimm ár var Þórólfur Árnason ekki metinn hæfastur til að gegna starfinu til næstu fimm ára og var Jón Gunnar Jónsson skipaður í stöðuna í hans stað. Þórólfur maldaði í móinn en hafi hann uppskorið einhverja samúð var hún fljót að fara þegar greint var frá því að Samgöngustofa hafi ákveðið að svipta bílaleiguna Procar ekki starfsleyfi sínu þrátt fyrir að hafa orðið uppvís að víðtæku svindli. Bætist það ofan á óánægju með linkind stofnunarinnar gagnvart WOW air sem fékk óáreitt að safna upp milljarða skuldum við Isavia.