Þórunn Sif Ravn er verulega ósátt út í Pírata og þá ritskoðun sem stunduð er á spjalli stjórnmálaflokksins á Faceook. Hún segist hafa verið búin að ákveða að kjósa flokkinn næsta haust en sé núna snarlega hætt við.
Þessu lýsir Þórunn yfir í færslu inn í Pírataspjallinu. „Vá…ég var buin að ákveða að kjósa Pírata í ár, en hef ekki verið á kjörskrá á Íslandi í fjölda mörg ár, en ég er snar hætt við! Mun ekki styðja svona ritskoðun! Ég set inn spurningu sem mig langar að fá sjónarhorn Pírata á og henni er kippt úr !!! Svona ritskoðun er mér ekki að skapi! Og ykkur til skammar!,“ segir Þórunn.
Elín Ýr Arnar Hafdísardóttir, einn stjórnenda spjallsins, biður Þórunni hins vegar afsökunar og skýrir hvers vegna færslu hennar inni á spjallinu var eytt þaðan. „Ástæðan var endurtekin umræða. Það átti þó vissulega að beina því á viðkomandi umræðu í stað þess að eyða án skýringar. Ég hef rætt við moderators og vona að þessi mikilvæga umræða geti áfram átt sér stað. Fyrir hönd stjórnenda spjallsins biðst ef afsökunar á þessari aðferð,“ segir Elín.
Björn Leví Gunnarsson, þingmaður Pírata, telur að færsla Þórunni hefði átt að fá að standa. „Ég skil heldur ekki af hverju það var farið svona með færsluna þína …hún var ágætlega málefnaleg. Að einhverju leyti er „endurtekin umræða“ alveg gild útskýring. Hvort það átti við í þessu tilviki veit ég ekki,“ segir Björn.
Hrafnkell Brimar Hallmundsson biður hvorki Þórunni né aðra að dæma flokkinn útfrá spjallinu á Facebook. „Vona að það leysist úr þessu máli og ég vona líka að fólk dæmi ekki Píratahreyfinguna alla út frá svona atvikum. Ég held nefnilega að það að stýra Íslandi sé mun einfaldara og auðveldara verkefni en að stýra Pírataspjallinu,“ segir Hrafnkell.
Alex Skúli Einarsson biður Þórunni vinsamlegast um að endurskoða ákvörðun sína. „Fyrir hönd islensks samfélags bið ég þig um að endurskoða ákvörðun þína um að kjósa ekki Pírata, þetta var klaufalegt en það er samt í alvörunni enginn betri kostur fyrir landið en þessi flokkur,“ segir Alex.
Þórunn virðist ætla að endurskoða málið þegar reiðin hefur runnið af henni. „Ja, það er allavega gott að það eru ekki kostningar í dag því ég mundi skila auðu! Hvað ég geri eftir að mér rennur reiðin veit ég ekki…. en mér finnst þetta vanhugsað, fljótfærnislegt og algerlega út úr kú….en ég er buin að fá afsökunarbeiðni. Svo kannski…,“ segir Þórunn.