Þrír létust og tveir voru fluttir alvarlega slasaðir með þyrlu Landhelgisgæslunnar á sjúkrahús eftir að einkaflugvél skall til jarðar við Múlakot í Fljótshlíð. Slysið átti sér stað um kl. 20.30 í gærkvöldi. Þetta kemur fram á Facebook síðu Lögreglunnar á Suðurlandi.
Samkvæmt tilkynningu lögreglu er líðan þeirra slösuðu stöðug. Rannsókn á tildrögum slyssins er í gangi og því getur lögreglan ekki veitt frekari upplýsingar að svo stöddu.
Laust eftir 20:30 í gærkvöldi barst tilkynning um flugslys nálægt flugvellinum við Múlakot í Fljótshlíð. Eldur var þá laus í flugvélinni. Fjölmennt lið lögreglu, slökkviliðs og sjúkraflutninga Heilbrigðisstofnun Suðurlands, ásamt tveimur þyrlum Landhelgisgæslunnar fóru á staðinn. Alls voru fimm aðilar í flugvélinni. Eins og áður segir hafa þrír látist og tveir eru alvarlega slasaðir.
Rannsóknardeild Lögreglustjórans á Suðurlandi fer með rannsókn málsins og nýtur aðstoðar Rannsóknarnefndar samgönguslysa og tæknideildar Lögreglunnar á Höfuðborgarsvæðinu. Viðbragðsteymi Rauðakross Íslands var sent á vettvang til að veita vitnum að atvikinu sálrænan stuðning.