Söngkonan Þuríður Sigurðardóttir undrast hvers illa útivistarfólk á með að fylgja fyrirmælum á fjölmennum útivistarsvæðum. Það finnst henni sérstaklega bagalegt á Covid-tímum þar sem útivistarfólk geti verið að anda framan í hvort annað.
„Getur verið að við Garðbæingar séum svo hægri sinnuð að við getum ekki gengið réttsælis kring um Vífilsstaðavatn s.s. til vinstri þegar komið er að skiltum við leiðir að vatninu – eða er eitthvað að hönnun skiltanna? Mér finnst hugsunin rökrétt, að allir gangi í sömu átt á tímum COVID – 19 og takmarka þannig að göngufólk andi framan í hvort annað,“ segir Þuríður í færslu inni í hverfishópi Garðbæinga á Facebook og heldur áfram:
„Því miður eru þeir sárafáir sem fara eftir þessum leiðbeiningum og ég hef reyndar grun um að það hafi ekkert með stjórnmálaskoðanir að gera heldur það að fólk tekur ekki eftir skiltunum þrátt fyrir gula litinn og rauða. Ég sjálf ætlaði að arka til hægri eins og ég er vön, þegar mér var bent á skiltið.“
Margrét nokkur virðist ekkert hissa á því hversu margir geti ekki hlýtt fyrirmælunum. „Íslendingar eru með eindæmum furðulegir þegar kemur að reglum/tilmælum „bara þegar mér hentar“ á ansi oft við,“ segir Margrét.
Anna Lilja er ekki ánægð með þetta heldur og segir skokkara þá sem oft brjóti reglurnar.
„Ég er búin að senda Garðabæ athugasemdir vegna þessa en hef ekki fengið nein svör. Ég persónulega geng alltaf réttsælis umhverfis vatnið en langflestir fara rangsælis, t.d. allir skokkarar sem koma eftir nýja stígnum neðan við Vífilsstaði. Það helgast kannski af því að allar hlaupabrautir eru hlaupnar rangsælis!,“ segir Anna.