Fjölskylda konu sem lést sólarhring eftir að hafa verið bólusett með efninu AstraZeneca vill að rannsakað verði hvort bóluefninu sé um að kenna. Ekkillinn og hin látna fengu bæði boð í seinni sprautuna núna á miðvikudaginn.
Í frétt RÚV kemur fram að Trausti Leósson, 74 ára, fékk sms fyrir helgi um að koma í seinni AstraZeneca sprautuna núna á miðvikudaginn. Hann og konan hans fengu fyrri sprautuna sama dag, 26. mars, og því ákvað hann að athuga í síma konunnar sinnar eftir að hann var búinn að hlaða hann: „Þegar hann [síminn] vaknaði, viti menn, þá var hún boðuð í bólusetninguna líka á miðvikudaginn þrátt fyrir það að hún hafi látist sólarhring eftir að hún hafði fengið fyrri sprautuna,“ segir Trausti.
Endurlífgun án árangurs
Kona hans, dönskukennarinn Þyri Kap Árnadóttir var 72 ára var heilsuhraust en eftir sprautu 26. mars fékk hún beinverki, missti matarlyst, og svaf lítið. Hún var ekkert skárri morguninn eftir og ákvað að fara í bað því henni var svo kalt.
Fljótlega missti hún meðvitund í baðkarinu og var flutt á bráðamóttöku þar sem reynt var að endurlífga hana án árangurs í tvö klukkutíma. Trausti segi að kvöldið áður hafi kona hans sagt honum að hún mynd gera hvað sem af henni væri ætlast. „En ef að einn af mörg þúsund þolir ekki þetta bóluefni þá er voðalega leiðinlegt að vera sá eini“.
Í frétt RÚV segir að Trausti og fjölskylda hafi reynt að vekja athygli fjölmiðla á dauðsfallinu án árangurs og segist Trausti bara hafa heyrt fréttir um dauðsföll í Noregi. Hann sendi síðan umboðsmanni Alþingis lýsingu á hvað gerst hafði og 20. maí sem tilkynnt var að óháð nefnd lyflækna myndi rannsaka fimm andlát og fimm tilkynningar um blóðtappa í kjölfar bólusetninga.
Rannsókn á fimm andlátum
Fjölskyldan vill að ef komi í ljós dauði Þyriar sé bóluefninu að kenna sé það gert opinbert þannig að fólk geti afþakkað bólusetningu. „Þyri stóð það ekki til boða,“ segir Trausti.
Andlátið var strax tilkynnt til Lyfjastofnunar. Stofnunin, landlæknir og sóttvarnalæknir láta nú gera rannsókn á fimm andlátum. Þetta kemur fram í fréttum RÚV.
Konur neita efninu
Það virðist langt því frá að umræðan um hættulegar aukaverkunum bóluefnisins AstraZeneca sé lokið. Íslenskar konur um og eftir fimmtugt hafa ítrekað neitað bóluefninu og krafist þess að notkun þess sé hætt, í það minnsta á meðan rannsóknir um hugsanlega blóðtappamyndum í kjölfar notkun efnisins standa enn yfir.
Miklar umræður má meðal annars að finna í umræðum á samfélagsmiðlum þar sem konur bera saman bækur sínar.
Landlæknisembættið hefur komið að hluta til til móts við þessar kröfur en margar miðaldra og eldri konur telja ekki nógu langt gengið og telja að banna eigið bóluefnið alfarið.
Norðmenn og Danir búnir að banna
Norðmenn og Danir hafa tekið þann kost að banna bólefni AztraZeneca. Í sjónvarpsfrétt 12. maí sagðist Þórólfur Guðnason sóttvarnalæknir vera algerlega ósammála dönskum læknum en sagðist ekki vita hvort rétt væri eftir þeim haft. Hann sagði að einn á móti 100 þúsund fengi aukaverkun.
Trausti segist ekki áfellast stjórnvöld.
„Nei, nei, ég geri það ekki. Þau hafa staðið sig mjög vel í þessu öllu en mér finnst þau kannski hafa verið einum of gráðug að nota þetta bóluefni meðan að aðrir vilja ekki nota það“ segir Trausti í viðtalinu.