Nú stendur yfir björgun á tíkinni Pílu sem týndist þann 6. janúar síðastliðinn í Bolungarvík. Hundurinn fældist flugelda, hvarf ofsahrædd út í buskann. Hún hefur ekki sést í tuttugu daga þrátt fyrir ákafa leit eigenda sinna. Í dag dró svo til tíðinda þegar kajakræðari sá tíkina frá sjó. Hún var á syllu í Stigahlíð þar sem hún hafði lent í sjálfheldu.
„Félagi minn er núna á kajak útaf Stigahlíðinni og telur sig sjá Pílu,“ skrifaði Tómas Rúnar Sölvason síðdegis inn á síðunni „Leitin að Pílu“ sem hefur haldið utan um leitina allar götur síðan hún týndist. Það eru yfir tíu björgunarsveitarmenn sem standa nú að björgun tíkarinnar sem er í svartamyrkri í klettahlíðinni. Á myndum má sjá að Píla hefur farið tugi metra fram og til baka í viðleitni sinni til að losna úr prísundinni en situr föst á syllunni þar sem þverhnýpi er bæði ofan við hana og neðan.
„Þetta er allt í gangi núna“ sagði Margrét Birgisdóttir, eigandi Pílu, í samtali við Mannlíf og bað um að haft yrði samband síðar.
Píla er tíu ára Border Collie hundur. Heima bíða hennar sex hvolpar.
