Þorbjörg Marinósdóttir, betur þekkt sem Tobba Marinós, ritstjóri DV, gefur ekki mikið út á framferði Björgvins Halldórssonar söngvara í sinn garð. Þrátt fyrir að vera 36 ára gamall ritstjóri fann söngvarinn sig knúinn til að hringja í eiginmann Tobbu til að kvarta undan hennar störfum.
Tobba lýsir því hvað reitti hana til reiði í ristjórnarpistli í DV. „Ég varð 36 ára gömul í vikunni en fann mig engu að síður í sömu stöðu og þegar ég var þrítug, tvítug og tíu ára. Mér eldri karlmaður vildi ræða við annan karlmann um mín störf. Þetta heilkenni einkennir oft eldri karlmenn sem treysta sér illa til að tala við konur, sérstaklega ef þær eru yngri en þeir. Heilkennið lýsir sé meðal annars í ótta eldri manns sem horfir yfir öxlina á konum í von um að finna annan eldri mann til að mynda augnsamband og ræða við,“ segir Tobba.
Tobba segir það hafa verið í liðinni viku að þjóðþekktur maður hafi haft samband við eiginmann sinn til að ræða störf hennar sem ritstjóra. „Þetta fannst mér ömurlegt. Atvikið þótti mér niðurlægjandi fyrir annars frábæran mann að ræða við eiginmann minn um mín störf. Störf sem téður eiginmaður hefur ekkert með að gera og ég hef reynt að setja hann sem minnst inn í. Ég hefði tekið því vel að ræða og útlista málið beint við manninn þó það reyndar hafi alls ekki fjallað um hann, heldur dóttur hans. En jú, pabbi hefur samband við eiginmann ritstjóra,“ segir Tobba og bætir við:
„Ég held því alls ekki fram að þetta tilvik, né það sem fyrr er rætt, sé sprottið af slæmum ásetningi eða dónaskap. Þetta er gamli hugsunarhátturinn sem er svo baneitraður. Ég er þrjátíu og fokking sex ára! Ekki klaga mig í eiginmann minn, pabba minn, eða aðra mér eldri karlmenn á svæðinu. Ekki tala fram hjá mér á fundum og ekki voga þér að halda að ég geti ekki talað mínu máli og gert heilkennið í þér fokhelt ef þarf. Nei! Pabbi minn er ekki heima!“
Það er augljóst á skrifum Tobbu að hér er um að ræða Björgvin og líklega hefur honum mislíkað skrif DV um Kristján Einar Sigurbjörnsson, kærasta Svölu Björgvins. Björgvin, faðir Svölu, vildi lítið ræða málið efnislega þegar Mannlíf sló á þráðinn. „Ég tala bara við hana sjálfur en ég bara fann ekki e-mailið hennar. Ég á eftir að hreinsa þetta mál,“ segir Björgvin.