Við sögðum frá brúðkaupsveislu Kat Von D og Rafael Reyes á dögunum, en brúðkaupið þeirra var allt í goth-stíl. Í kjölfarið var okkur bent á að í versluninni Rokk & Rómantík í miðbæ Reykjavíkur væri hægt að fá einstakan kjól fyrir þá sem vilja hafa brúðkaupið dálítið goth.
Anna Kristín Magnúsdóttir rekur verslunina og segir að einn og hálfan dag hafi tekið að sauma kjólinn, sem er kolbikasvartur. Vinsældirnar létu ekki á sér standa.
„Hann er seldur, en það er reyndar annar í vinnslu,“ segir Anna og bætir við að kjóllinn sé seldur á rétt tæplega fimmtíu þúsund krónur.
En af hverju goth?
„Af hverju hvítur?“ segir Anna og hlær. „Það er bara svo frábært að fjölbreytileikinn sé í boði.“
Anna rekur einnig verslunina Kjólar & Konfekt og finnur mikið fyrir því að brúðir vilji fara óhefðbundnar leiðir á stóra daginn. Það er því aldrei að vita hvers konar brúðarkjóll kemur úr smiðju hennar á næstu misserum.
