Trausti Eysteinsson, múrari og öndunarsérfræðingur, telur sig lagðan í einelti í netheimum þrátt fyrir að hafa fullkomlega rétt fyrir sér. Hann leggur á það áherslu að reiði sín beinist ekki gegn starfsfólki verslana og því vill hana nota tækifærið og biðja starfsmenn Bónus afsökunar.
Trausti varð frægur á einu augabragði eftir að hann birti myndband af sér í Bónus þar sem hann streittist gegn grímuskyldu verslunarinnar. Annað eins skítkast og helltist yfir hann í kjölfarið segist öndursérfræðingurinn ekki áður hafa séð. Aðspurður hvort upplifunin sé særandi svarar Trausti játandi.
„Það er ótrúlegt níð og svakalegt einelti í gangi. Ég er bara dæmdur án dóms og laga. Það eru allir með tilfinningar en þarna er sofandi fólk að særa, talandi upp úr svefni. Ég ætla ekki að vera reiður út í þetta fólk, þetta fýkur af mér eins og ekki neitt. Ég veit alveg hvað ég er að gera og veit þetta miklu betur enda menntaður í því að kenna fólki að anda. Í þessu myndbandi var ég ekki að tala við starfsfólkið heldur yfirvaldið og í rauninni alla þá sem eru sofandi þarna úti. Þessi forræðishyggja er svakalegt svindl og það mun kom betur upp á yfirborðið. Heimurinn er að falla og pólitíkusarnir eru að nota Covid til að breiða yfir skítinn,“ segir Trausti sem ítrekar að hann viti vel hvað hann talar um:
„Ég veit alveg hvað ég er að gera og veit þetta miklu betur enda menntaður í því að kenna fólki að anda.“
„Ég er búinn að vera að vinna í þessu allan daginn síðustu sjö mánuði, frá morgni til kvölds þannig ég veit alveg hvað ég er að tala um. Þá er ég búinn að vera að kenna öndun síðustu þrettán ár. Fólk er blekkt og þess vegna lét ég heyra í mér. Mér gengur gott eitt til. Ég þekki persónulega fullt af læknum sem eru búnir að stíga til hliðar og eru brjálaðir. Það er verið að fremja glæp gegn fólki, ég sé þetta alveg.“
Glæpurinn sem Trausti vísar þar til er skyldunotkun á andlitsgrímum með hertum aðgerðum sóttvarnaryfirvalda. Hann ætlar að ráðast í og kosta sjálfur auglýsingaherferð á næstunni. „Ég er að búa til auglýsingu núna með grafískum hönnuði sem á að fara á strætó og allt saman. Þar mun ég kenna fólki að anda og vinna bug á meðvirkninni. Þetta eru gríðar erfiðir tímar sem við erum stödd á. Sjálfur fæ ég ekki að sjá barnið mitt því hún var þvinguð í Covid-test sex ára gömul. Hún var með tárin í augun þegar hún sagði mér frá því,“ segir Trausti í samtali við Mannlíf.
„Það er svo einfalt að sjá í gegnum þetta ef maður er pínu meðvitaður um lungun á sér.“
Í netheimum hefur Trausti verið gagnrýndur fyrir að beina reiði sinni að starfsfólki Bónus, eins og sjá má í myndbandinu. Alla þá sem misskildu skilaboðin sín vill hann biðjast afsökunar. „Sérstaklega starfsfólkið í búðinni, auðvitað. Ég er skapmaður en ég er líka fljótur niður og mjög fljótur að segja fyrirgefðu. Ég er ekkert pirraður út í það heldur útí það hvað yfirvöld eru að láta fólk gera. Grímurnar gera ekki neitt gagn. Það er verið að taka súrefni frá fólki. Það er svo einfalt að sjá í gegnum þetta ef maður er pínu meðvitaður um lungun á sér. Frá því að ég var eins árs hef ég verið með sködduð lungu og ég get ekki gengið með grímu. Með henni er ég alltaf að kafna. Gríman er filter gagnvart því að með útöndunninni náum við ekki að losa eiturefnin út. Ég hreinlega þoli ekki þessa forræðishyggju,“ segir Trausti.