Stjórn VR lýsir yfir trúnaðarbresti á fundi sínum í gær, þar sem samþykkt væri að bera upp tillögu um að afturkalla umboð stjórnarmanna VR í Lífeyrissjóði verzlunarmanna.

Stjórn VR segir ákvörðunina komna til vegna þess að stjórn VR telur að trúnaðarbrestur hafi orðið meðal stjórnarmanna VR hjá lífeyrissjóðnum við félagið, stefnu þess og nýgerðan lífskjarasamning og kemur í kjölfar samþykktar stjórnar lífeyrissjóðsins um hækkun breytilegra vaxta verðtryggðra sjóðfélagalána úr 2,06% í 2,26%.

Stjórn VR segir þá ákvörðun óskiljanlega í ljósi þeirra gríðarlega miklu áherslu sem lögð var á vaxtalækkanir í nýgerðum kjarasamningum.

Eins er mótmælt harðlega að samhliða vaxtahækkun hafi einnig verið tekin ákvörðun um að hætta að hafa ákvarðanir um breytingar á vöxtum í föstu opnu ferli og færa það einhliða til stjórnar Lífeyrissjóðsins. Slíkt sé dæmi um spor afturábak.

Boðað verður til fundar í fulltrúaráði VR hjá Lífeyrissjóði verzlunarmanna þar sem lögð verður fram tillaga að afturkalla umboð stjórnarmanna VR í Lífeyrissjóði verzlunarmanna og ný stjórn verði skipuð til bráðabirgða.