Undanfarin 30 ár hefur Endurvinnslan hf. endurgreitt 41 milljarð fyrir drykkjarvöruumbúðir til viðskiptavina ef miðað er við skilagjaldið eins og það er í dag, 16 krónur. Þetta kemur fram í umfjöllun Morgunblaðsins.
Í grein Morgunblaðsins kemur þá fram að árið 2019 endurgreiddi Endurvinnslan um 2,5 milljarða fyrir flöskur og dósir til viðskiptavina.
Í greininni er haft eftir Helga Lárussyni, framkvæmdastjóra Endurvinnslunnar, að flestar flöskur og dósir komi frá einstaklingum en einnig komið mikið frá íþróttafélögum, björgunarsveitum og góðgerðarfélögum.
Þess má þá geta að skilagjaldið hefur hækkað smátt og smátt frá því að Endurvinnslan hf. var stofnuð árið 1989 en þá var skilagjald fyrir drykkjarvöruumbúðir fimm krónur.
Selt út til endurvinnslu
Endurvinnslan sér um móttöku, ásamt umboðsmönnum sínum, allra einnota drykkjarvöruumbúða hérlendis, greiðir út skilagjald þeirra, undirbýr þær til útflutnings og selur til endurvinnslu. 58 starfstöðvar starfa fyrir félagið um allt land.
Á vef Endurvinnslunnar er fjallað um verðmæti drykkjarumbúða. Þar segir: „Drykkjarumbúðir eru ekki aðeins endurunnar til gagns fyrir náttúruna, þær eru einnig verðmæti. Útflutningsverðmæti þeirra nemur þannig á hverju ári um 200 millj.kr. En umbúðir eru misjafnar. Mest fæst fyrir ál og glært plast úr PET efni (merkt með tölustafnum 1 á umbúð), en það eru algengustu plast umbúðirnar. Strax og plastið er litað, minnkar verðmæti þeirra.”