Vefsíðan worlddata.info hefur birt lista yfir meðallengd getnaðarlima karlmanna í 88 löndum ásamt meðalhæð og hlutfalli lengdar lims og líkama. Ísland er ekki á listanum.
Ecuador eru í senn með stærstu typpin og jafnframt hæsta hlutfall lims og meðalhæðar. Afríkuþjóðir eru áberandi í efstu tíu sætunum en eina Evrópuþjóðin á listanum er Holland í 9. sæti en Frakkar eru í því 11.
Bandaríkjamenn eru í 60. sæti listans, einu sæti ofar en Japanir, Rússar í því 65. og Bretar í því 69., einu sæti ofar en Kínverjar.
Vefsíðan birtir jafnframt ítarlegar leiðbeiningar varðandi hvernig staðið skuli að mælingum á getnaðarlimum en þar er útlistað að limur skuli alltaf mældur frá ofanverðum rótum limsins að enda reðurhúfunnar og ef fituríkt svæði umlykur rót limsins er óhætt að þrýsta svæðinu örlítið niður á meðan mælingu stendur.
Ummál skal tekið við rót limsins en þar sem sumar mælingar sem rannsóknin byggði á voru gerðar á reðurhúfu voru ummálsmælingar taldar ónothæfar og því ekki birtar með.
Niðurstöðurnar virðast renna stoðum undir þá staðhæfingu að lítil sem engin fylgni sé milli limlengdar og líkamshæðar, a.m.k. þar sem limlengd er 12 sentimetrar eða lengri en þó ber að benda á að stystu typpin á listanum tilheyra gjarnan þjóðum þar sem líkamshæð er einnig lág.
Fram kemur að illmögulegt sé að áætla með vissu um lengd typpis í fullri reisn byggt á lengd þess þegar það er lint en þar er útskýrt að 80 prósent karlmanna séu með blóðlim, það sem gjarnan er kallað „grower“ á ensku en slík typpi stækka mikið þegar umtalsvert flóðflæði verður þegar stinning á sér stað, en 20 prósent karlmanna séu með holdlim, eða gjarnan „shower“ á ensku þar sem umtalsvert hold er þegar til staðar og blóðflæðið hefur mun minni áhrif á liminn í fullri reisn.
Ennfremur er sú niðurstaða birt að hvorki skóstærð né lengt vísifingurs hafi merkjanlega fylgni gagnvart stærð getnaðarlims.