Þingmenn Pírata og Sjálfstæðisflokksins taka afstöðu gegn þeirri hugmynd menntamálaráðherra að loka á klám fyrir ungmenni. Sú aðferð hefur verið gagnrýnd síðustu daga á samfélagsmiðlum og sögð bæði óraunhæf og röng.
Nemendur virðast hafa ólíkar skoðanir á málinu þó margir séu fylgjandi klámbanni og segja klám skaðlegt.
Vísir fjallaði um málið og talaði við nemendur Hagaskóla.
„Klám er svosem vandamál að sjálfsögðu, en þessar lausnir bara virka ekki. Það er ekki hægt að framkvæma þær,“ sagði einn nemandi.
„Mér finnst þetta jákvætt, vegna þess að klám getur haft svo brenglaða ímynd af því hvað kynlíf er fyrir unga einstaklinga,“ sagði einn neminn en bætti við að hún væri óviss hvort að þessar aðgerðir myndu stoppa alla í því að horfa á klám.
„Við getum náttúrulega ekki látið alla hætta að horfa, en ég held að þetta muni minnka samt mikið fyrir einhverja sem kunna ekki að finna þetta annars vegar,“ sagði þriðji neminn að lokum.