„Til hvers í ósköpunum var þetta málþóf eiginlega?!” spyr Guðlaugur Þór Þórðarson, utanríkisráðherra, á Facebook eftir að Miðflokkurinn samþykkti atkvæðagreiðslu um þriðja orkupakkann.
„Eftir að hafa staðið í ræðupúlti Alþingis í vel á annað hundrað klukkustundir hefur Miðflokkurinn samið um að atkvæðagreiðsla um 3. orkupakkann fari fram 2. september,” skrifar Guðlaugur og bætir við: „Miðflokkurinn hefur þar með fallið frá kröfum um málinu verði frestað fram á næsta þing. hann hefur fallið frá kröfum um að Alþingi skipi sérstakan starfshóp til að fara yfir málið að nýju og hann hefur fallist á að ljúka umræðunni á tveimur dögum.”
Miðflokkurinn stóð fyrir málþófum í maí um þriðja orkupakkann sem voru lengstu umræður þingsins. Þá stóðu þær yfir heilu næturnar og flokkurinn lýsti því yfir að umræðan væri að þeirra mati rétt „að komast almennilega á skrið.“ Stefna Miðflokksins virtist vera að stöðva samþykkt þriðja orkupakkans alfarið og ekki var séð fram á að málamiðlun yrði gerð milli flokksins og stjórnarflokkar. Stöðutakan gæti aukið vald stjórnarandstöðunnar.
Samskonar taktík en ríkisstjórnarflokkum í hag er þegar stjórnarmeirihlutinn sveltir þingið stórum og mikilvægum frumvörpum í upphafi þings og fram eftir en dælir svo miklum fjölda verkefna á þingið rétt fyrir lok þess. Þannig skapast tímaþröng og verkefnafjall sem minnkar um leið yfirlestur og dregur úr getu stjórnarandstöðunnar og óbreyttra þingmanna til að grandskoða mál.