Góð ráð fyrir þá sem vilja stunda líkamsrækt á veturna.
Það er engin ástæða til þess að stunda ekki útivist á veturna, svo lengi sem maður útbýr sig rétt. Hér eru nokkur góð ráð fyrir þá sem vilja stunda líkamsrækt á veturna.
Vertu sýnilegur
Þegar dagurinn styttist neyðast margir til a fara út að hlaupa eða hjóla í rökkri. Þá er mjög mikilvægt að vera í fötum með endurskinsrákum. Best er að endurskinið sé á hand- og fótleggjum því það eru þeir hlutar líkamans sem eru á hreyfingu og grípa ljós frá bílum. Ef þú ert mikið fyrir að hlaupa í náttúrunni getur verið sniðugt að vera í litríkum eða áberandi klæðnaði að ofan ef svo óheppilega vill til að þú týnist eða villist, þá er auðveldara að koma auga á þig úr fjarlægð.
Ekki dúða þig um of
Það getur verið freistandi að klæðast öllum sínum hlýjustu fötum þegar veðrið er sem kaldast en það getur stundum haft þveröfug áhrif. Þú byrjar nefnilega að svitna sem gerir það að verkum að fötin verða rök og þá getur orðið mjög óþægilegt að hreyfa sig. Þér er einnig hættara á ofkælingu ef þú ert úti til lengri tíma. Þumalputtareglan er að klæða sig eins og það sé 5°heitara en það er í raun.
Ekki geyma símann í vasanum
Það er vissulega gáfulegt að taka símann ávallt með sér þegar þú stundar líkamsrækt utandyra. Jafnvel þó ekkert alvarlegt gerist þá getur verið gott að geta hringt í einhvern til að ná í þig þegar þú ert örmagna 5 km frá heimili þínu. Á veturnar getur síminn hins vegar ofkólnað eða blotnað ef hann er geymdur í utanáliggjandi vasa. Reyndu að velja föt með vösum innan á eða vera með litla tösku sem þú getur verið með innanklæða.
Ekki þurrka skóna á ofni
Flestir hlaupaskór eru úr dýrum plastefnum eða leðri sem geta auðveldlega skemmst í of miklum hita. Besta ráðið til að þurrka gegnblauta skó er að troða dagblöðum inn í skónna sem draga í sig rakann – mundu bara að skipta dagblöðunum út eftir þörfum.
Strax úr fötunum
Margir gera þau mistök að fara að sinna einhverjum verkefnum um leið og þeir koma inn úr dyrunum – hvort sem það er kvöldmatargerð, sjónvarpsgláp eða tékka á tölvupósti. Þegar maður kemur inn úr kuldanum er fyrir öllu að fara strax úr rökum íþróttafötum, í volga sturtu og svo í þurr föt.