Ýmis áhugaverð ummæli féllu í vikunni. Vægast sagt.
„Til að fullmóta lýðveldið Ísland þarf fleiri alþýðubyltingar.“
Gunnar Smári Egilsson athafnamaður.
„Nú þykir fínt að reynslulítið fólk, sem hefur fengið pólitískt vægi með slíkt nesti langt umfram það sem áður tíðkaðist, tali niður til flokkssystkina sinna og leggi lykkju á leið sína til að vísa þeim sem eldri eru út úr umræðunni með þótta sem fer öllum illa. Það kann ekki góðri lukku að stýra.“
Davíð Oddson, ritstjóri Morgunblaðsins, skýtur, enn og aftur, föstum skotum á flokksforystu Sjálfstæðisflokksins.
„Það má segja að með þessu séu Íslendingar að selja erlendum fyrirtækjum aflátsbréf sem gerir þeim kleift að fresta sínum umbótum í loftslagsmálum.“
Magnús Þór Ásmundsson, forstjóri Alcoa Fjarðaáls, gagnrýnir sölu á upprunaábyrgðum raforku til annarra landa.
„Nú fjarar hins vegar undan lýðræði víða um lönd og þar með talið í landinu sem fagnar 75 ára lýðveldisafmæli í dag. Ástæðan er einkum sú að stjórnmálamenn gefa frá sér sífellt meiri völd og við tekur aukið kerfisræði þar sem ókjörnum fulltrúum er ætlað að stjórna málum.“
Sigmundur Davíð Gunnlaugsson, formaður Miðflokksins.
„Ég er barnlaus, á engin börn og veit ekki hvort mig langi í börn. Samfélagið vill að ég eigi barn og þó að lögin leyfi mér að ráða sjálf hvað ég geri við líkama minn þá minnir samfélagið mig stöðugt á að ég sé að vanrækja skyldu mína, tilgang minn í lífinu, móðureðlið.“
Kristlín Dís, pistlahöfundur á Stundinni.
„Hvers vegna eru vinstri menn sífellt að hnýta í afmælisbarn dagsins, Jón Sigurðsson …? Hvers vegna reyna þeir að gera lítið úr þessum merka hugsuði og stjórnmálaforingja? Það er vegna þess, að þeir geta ekki eignað sér Jón Sigurðsson, því að hann var gætinn og jafnvel íhaldssamur, þjóðlegur frjálshyggjumaður …“
Hugleiðingar Hannesar Hólmsteins Gissurarsonar, prófessors í stjórnmálafræði við Háskóla Íslands, á 17. júní.
„Vá, hvað ég er ánægð að sjá að þú borðar líka KFC. Það lætur mér líða miklu betur með að vera hérna.“
Ónefnd kona varpaði öndinni léttar við að rekast á meistarakokkinn Hrefnu Rós Sætran á KFC á Selfossi.
Mynd / Hákon Davíð Björnsson