Á miðvikudaginn, þjóðhátíðardaginn, er hæg suðlæg átt í kortunum, 3-8 m/s. Væntanlega verður þurrt um allt land. Þetta kemur fram í hugleiðingum veðurfræðings á vef Veðurstofunnar. Þar segir að norðanlands verður víða bjart veður á miðvikudaginn, en meira af skýjum á himni á sunnanverðu landinu, þó eflaust sjáist til sólar á milli skýjanna. Þokuloft gæti sett strik í reikninginn og er þokan líklegust til að láta á sér kræla með austurströndinni.
Um veðrið í dag segir að útlit sé fyrir sunnanátt á bilinu 5-13 m/s. „Víðfemt skilakerfi fer yfir landið frá vestri til austurs með tilheyrandi rigningu og súld. Mest verður vætan sunnanlands, en þó áttin sé suðlæg mun einnig rigna af og til á Norður- og Austurlandi sem er gott fyrir gróðurinn á þeim slóðum. Á vestasta hluta landsins verða skilin farin yfir kringum hádegi og handan skilanna taka við smávegis skúrir. Seinnipartinn í dag og í kvöld dregur einnig úr vætunni í öðrum landshlutum,“ segir á vef Veðurstofunnar.
Þá segir að á morgun taki suðvestanátt við, allvíða 5-10 m/s. Búast má við dálitlum skúrum í flestum landshlutum. „Líklega hangir hann þó þurr á Suðausturlandi og Austfjörðum. Hiti 8 til 16 stig, hlýjast norðaustantil á landinu í dag, en suðaustanlands á morgun.“