Lögreglan á höfuðborgarsvæðinu fékk nokkrar tilkynningar í gær um ökumann og farþega bifreiðar sem væru að veifa skammbyssu og beina henni að vegfarendum. Lögreglan stöðvaði bifreiðina skömmu síðar. Um var að ræða mann og konu á þrítugsaldri, sem viðurkenndu athæfið og sögðust hafa gert þetta í gríni. Fólkið fékk að fara að lokinni skýrslutöku.
Rétt fyrir klukkan 19 í gærkvöldi var tilkynnt um ungan mann gangandi eftir miðri akbraut og valdandi hættu og truflun. Maðurinn var í mjög annarlegu ástandi, hlýddi ekki fyrirmælum lögreglu og veitti mótspyrnu við handtöku. Var hann vistaður í fangageymslu.
Fjórir voru teknir grunaðir um akstur undir áhrifum áfengis/fíkniefna. Skráningarmerki voru tekin af 55 ökutækjum vegna þess að ekki var staðið skil á vátryggingu / fært til skoðunar.