Illugi Jökulsson tók dóttur sína úr Landakotsskóla.
„Sem betur fór virðist stúlkan sjálf hafa skynjað illskuna því hún lagði fæð á séra Georg og sneri sér alltaf undan þegar hann kom inn í bekkinn og neitaði að snúa sér aftur fram fyrr en hann var farinn.”
Þetta skrifar fjölmiðlamaðurinn Illugi Jökulsson á Facebook, þar sem hann segist hafa farið með fimm ára dóttur sína í Landakotsskóla árið 1995. Enginn hafi sagt þeim foreldrunum hvað var gangi. Enginn. En með því er Illugi að vísa í skefjalaust ofbeldið sem þáverandi skólastjóri Landakotsskóla, séra Ágústus George og þýski kennarinn Margrét Muller beittu börn við skólann árum og áratugum saman áður en upp komst um ódæðisverkin.
„Sem betur fór virðist stúlkan sjálf hafa skynjað illskuna því hún lagði fæð á séra Georg og sneri sér alltaf undan þegar hann kom inn í bekkinn og neitaði að snúa sér aftur fram fyrr en hann var farinn.”
Umrædd dóttir Illuga er engin önnur en útvarpskonan góðkunna Vera, sem hefur vakið athygli fyrir þættina Í ljósi sögunnar á RÚV þar sem atburðir og málefni líðandi stundar eru skoðaðir í sögulegu samhengi.
Fjöldi fólks hefur stigið fram undanfarið og minnst Landakotsskóla með óhug í kjölfar fréttar um vinnslu nýrra heimildaþátta um voðaverkin sem voru framin í skólanum. Þar á meðal rithöfundurinn Vigdís Grímsdóttir, leikkonan Edda Björgvinsdóttir og söngvarinn Krummi Björgvinsson, Krummi í Mínus sem hefur lýst ofbeldinu sem séra George og Margrét beittu hann í æsku. Saga Krumma er tilefni skrifa Illuga, sem kveðst hafa forðað barnungri dóttur sinni úr skólanum. „Við tókum hana úr skólanum eftir einn vetur.”
Þakkar Illugi Krumma fyrir að opna sig um málið eins og söngvarinn hefur gert á samfélagsmiðlum. „Að stíga fram með þeim hætti sem þú gerir hér er eitt skrefið enn í þá átt að svona endurtaki sig ekki. Takk!”