Mikil verðhækkun í Bónus – VERÐKÖNNUN – Eggin hækkað um 25 prósent

Á síðustu tveimur árum hefur verðlag í Bónus hækkað um allt að fjórðung. Þannig hefur til dæmis verð á eggjum frá Stjörnueggi hækkað um 25 prósent á tímabililnu.

Við verðkönnun sem Mannlíf framkvæmdi kom í ljós mikil hækkun milli ára á ákveðnum vörutegundum. Borin voru saman verð á sömu vöruflokkunum með nákvæmlega 2 ára millibili, sama dag í febrúarmánuði 2019 annars vegar og nú í ár hins vegar.

Hlutfallslega var hækkunin mest á íslenskum vörutegundum. Egg hækkuðu um 25 prósent, Kea skyr um 14 prósent og Myllu samlokubrauð um 12 prósent. Af erlendum vörum sem hækkuðu umtalsvert má nefna hvítlauk en hann hækkaði um 13 prósent, rauða papriku sem hækkaði um 12 prósent og Euro Shopper kexi sem hækkaði um 13 prósent.

Tvær vörutegundir stóðu í stað, báðar íslenskar. Heill aspas frá Heima og hrásalat frá Nonna.