Í hverri viku tekur Mannlíf saman eftirminnileg ummæli. Óhætt er að segja að nokkrar sleggjur hafi fallið í vikunni.
„Við eigum semsagt bara að borga reikninginn? Þakka þér.“
Þóra Kristín Ásgeirsdóttir, upplýsingafulltrúi Íslenskrar erfðagreiningar. Tilefni ummælana er niðurstaða kærunefndar jafnréttismála sem komst að þeirri niðurstöðu að Þingvallanefnd hefði brotið gegn jafnréttislögum við skipan þjóðgarðsvarðar árið 2018, þegar nefndin valdi Einar Sæmundsen fram yfir Ólínu Kjerúlf Þorvarðardóttur í starfið. Ríkið þarf að greiða Ólínu 20 milljónir í bætur.
„Það hefði engu máli skipt hvort þau hefðu samið um eina milljón eða tuttugu. Ég ber enga ábyrgð á þessum gjörningi þarna. Hann er alfarið á ábyrgð Ólínu og ríkislögmanns.“
Ari Trausti Guðmundsson, formaður Þingvallanefndar.
„Hjá öllu þessu hefði mátt komast … jafnvel bara ein afsökunarbeiðni hefði getað lækkað þennan reikning töluvert.“
Ólína Kjerúlf Þorvarðardóttir, rithöfundur og fyrrverandi þingmaður.
„Nú vill útgerðin líka fá borgað fyrir að leita að loðnunni sem hún ætlar síðan að veiða og græða á. Þetta hlýtur að teljast Evrópumet í ósvífni.“
Kristinn Hrafnsson, ritstjóri Wikileaks. Tilefnið er frétt RÚV þess efnis að Hafrannsóknastofnun hafi ekki efni á að greiða útgerðarfyrirtækjum fyrir þátttöku í loðnuleit.
„Hvers vegna þetta úrræðaleysi? Hví er ekki hægt að laga þetta? Allir hljóta að skilja að þetta er algjörlega til skammar og stórhættulegt. Líf og heilsa sjúklinga eru í veði.“
Egill Helgason fjölmiðlamaður um stöðuna á bráðamóttöku Landspítalans.
„Hafa sýnt af sér bæði ráðaleysi og yfirgang.“
Vilhjálmur Þ. Vilhjálmsson, fyrrverandi borgarstjóri Reykjavíkur, gagnrýnir núverandi borgarstjórnarmeirihluta harðlega m.a. fyrir aðförina að einkabílnum og umfangsmikil byggingaáform í Elliðaárdal.
„Þetta eru mínir peningar, ríkið á ekkert tilkall til lífeyrissjóðakerfisins.“
Þetta sagði Helgi Pétursson, forsvarsmaður Gráa hersins. Samtökin hafa höfðað mál gegn ríkinu vegna skerðinga á bótum úr almannakerfinu sem gerist þegar eftirlaunaþegar ná tiltekinni upphæð greiðslna úr lífeyrissjóðum.
„„Going Vegan saves the planet“. Það er bara ekki satt. Því miður. Jafnvel þó að maður gjarnan vildi það.“
Sævar Helgi Bragason vísindamaður. Grænkerar hafa gagnrýnt Sævar sem hefur látið til taka í umhverfismálum fyrir að vera ekki grænkeri og leggja ekki nógu mikla áherslu á kjötlaust mataræði.