Vilhjálmur rís upp Ingó til varnar – Blaðamenn og áhrifavaldar verða kærðir

Blaðamenn, áhrifavaldar og fólk sem hefur ásakað Ingó Veðurguð um refsiverða háttsemi mega eiga von á kæru eftir að lögfræðingurin Vilhjálmur H. Vilhjálmsson gekk til liðs við Veðurguðinn. Ríkisútvarpið greindi frá þessu.

Fimm verða að biðjast afsökunar

Kæran kemur í kjölfar þess að Aðgerðahópurinn Öfgar birti 32 nafnlausar sögur sem fjölluðu um meint brot Ingó gegn fjölda kvenna. Samfélagsmiðlar hafa logað og fjöldi fólks lagt orð í belg. Það verða fimm einstaklingar sem fá kröfubréf að sögn Vilhjálms, allt fólk sem sakað hefur Ingó um refsiverða háttsemi eða það sem Vilhjálmur vill kalla ærðumeiðandi aðdróttanir, hvort sem er á samfélagsmiðlum eða fjölmiðlum.

Verður þeim gert að draga ummæli sín til baka, biðjast afsökunar á þeim og greiða miskabætur og lögmannskostnað.

Dómstóll götunnar aðför að réttaríki

„Það er algjört grundvallaratriði að fólk gæti að orðum sínum og brúki lögvarið tjáningarfrelsi sitt þannig að það vegi ekki að friðhelgi einkalífs og æruvernd annarra. Og það er það auðvitað þannig og það er hluti af lýðræðinu og réttarríkinu að þeir sem telja á sér brotið hafa ákveðnar leiðir til að ná fram rétti sínum. Ég tel að dómstóll götunnar, sem þetta er, sé aðför að þeim sáttmála,“ segir Vilhjálmur við RÚV og segir Ingó hvorki hafa verið kærðan né ákærðan né dæmdan fyrir hegningarlagabrot, hvað þá heldur fyrir kynferðisbrot.

Ingó búinn að missa giggin

Vilhjálmur segir alveg ljóst að Ingólfur hafi orðið fyrir stórkostlegu tjóni, bæði fjárhagslegu og ófjárhagslegu sem aldrei verði bætt að fullu. „En honum er nauðugur einn sá kostur að fara í þessar aðgerðir, stíga niður fæti og stöðva þennan ósóma.“

Ingólfur hefði verið afbókaður víðast hvar eftir að nafnlausu ásakanirnar birtust. Stöð 2 hefur sömuleiðis aflýst þriðju þáttaröðinni af Í kvöld er gigg og hefur tekið úr sýningu þáttaröð 2 sem hefur verið í endursýningu. „Það stóð til að það yrði gerð önnur sería í haust en við á­kváðum snemma í vor að setja þættina í pásu vegna um­ræðunnar sem var þá í gangi,“ hafði visir.is eftir Þórhalli Gunnarssyni, framkvæmdastjóra miðla hjá Sýn.