Dagur B. Eggertsson borgarstjóri segist standa við allt það sem hann sagði í viðtali við Kastljós en Sólveig Anna Jónsdóttir, formaður Eflingar, hefur áður sagt borgarstjóra lofa öllu fögru í fjölmiðlum en það sem gerist í samningaherberginu sé ekki í neinu samræmi við þau loforð hans.
„Ég stend að sjálfsögðu við allt sem ég sagði í Kastljósi á sínum tíma en það er ekki gagnlegt þegar reynt er að að snúa út úr þeim yfirlýsingum eða standa í skeytasendingum í fjölmiðlum til að leysa kjaradeilur. Gott tilboð borgarinnar um að hækka laun Eflingarfólks hjá borginni liggur fyrir, með sérstakri áherslu á að bæta lægstu laun og kjör kvennastétta,“ skrifar Dagur meðal annars. Hann boðar Sólveigu Önnu til fundar til að ræða framhaldið.
„Ég er að sjálfsögðu tilbúin að hitta þig á fundi eins og þú leggur til, en með tveimur skilyrðum.“
Anna Sólveig svarar á Facebook og skrifar m.a.: „Ég er að sjálfsögðu tilbúin að hitta þig á fundi eins og þú leggur til, en með tveimur skilyrðum. Í fyrsta lagi að þú birtir opinberlega það tilboð (glærurnar) sem samninganefnd minni var kynnt á samningafundi 19. febrúar, daginn sem þú mættir í Kastljóssviðtalið, þannig að allir geti borið tilboðið saman við ummæli þín í Kastljósinu. Í öðru lagi að þú fallist á að mæta mér eða öðrum fulltrúa Eflingar í setti í útvarps- eða sjónvarpsviðtali áður en vikan er úti.“
Hún bætir við: „Ef þú fellst á þetta þá skal ég koma og hitta þig til fundar á hvaða tíma sem hentar þér.“
Sjá einnig: Segir of mikla orku fara í að efna til átaka og skapa tortryggni