Elvar Reykjalín, framkvæmdastjóri og eigandi heitu pottanna í Sandvíkurfjöru við Hauganes, segir leitt að komast að því að óprúttnir aðilar hafi brotið upp peningakassa við pottana og rænt innihaldinu í fyrrinótt. Elvar skrifar um málið á Facebook.
Hann segir þjófana líklegast hafa orðið fyrir vonbrigðum því það skili sér oftast lítið í peningakassann.
„Vonbrigði viðkomandi urðu mikil er hann leit þetta skítti sem var í kassanum enda borga aðeins um 40 % þennan litla 500 kall sem kostar í böðin,“ skrifar Elvar. Hann segir mikla vinnu fara í að reka pottana en að reksturinn skili litlu í kassann.
Hann segir þjófana hafa náðst á eftirlitmyndavél og að málið sé komið til lögreglu.
Slæm umgengni á nóttunni
Í færslu sinni segir Elvar einnig að framvegis muni kann kæla pottana klukkan 22.00 á kvöldin og hitaður aftur upp klukkan 09.00 á morgnanna. Er þetta gert vegna slæmrar umgengni næturgesta.
„Mér þykir leitt að þurfa að tilkynna að vegna stanslausra næturheimsókna í pottana á Hauganesi með ekki góðri umgengni og ónæði fyrir íbúana neyðist ég til að kæla þá niður kl 22:00 á hverju kvöldi og hita þá svo upp aftur kl 9:00 á morgnana.“