Dýraverndarsamband Íslands, í samvinnu við þýsk-svissnesku dýraverndarsamtökin Animal Welfare Foundation (AWF) og Tierschutzbund Zürich (TSB), hefur kært brot á lögum um dýravelferð við blóðmerahald til lögreglunnar á höfuðborgarsvæðinu, en þetta kom fram í tilkynningu frá samtökunum.

Í kærunni er vísað í upptökur sem AWF og TSB samtökin náðu af blóðmerahaldi síðasta haust; segja samtökin myndböndin sýna alvarleg og kerfisbundin brot gegn velferð hryssa.

Matvælastofnun hafði málið til rannsóknar en tilkynnti síðasta haust að málinu yrði ekki vísað til lögreglu.

„Ef annað blóðtökutímabil fær að hefjast eru að óbreyttu yfirvofandi frekari brot gegn lögum um velferð dýra. Telja samtökin því þann eina kost færan að kæra málið beint og krefjast þess að lögreglan á höfuðborgarsvæðinu rannsaki málið með sjálfstæðum hætti. Mikilvægt er að niðurstaða liggi fyrir sem fyrst,“ segir í tilkynningu sambandsins.