Miðbakkinn við höfnina, þar sem áður voru bílastæði, verður framvegis opið svæði fyrir almenning. Reykjavíkurborg efnir til hátíðarhalda á svæðinu á morgun vegna þessa.
Á vef Reykjavíkurborgar kemur fram að borgin og Faxaflóahafnir hafi endurheimt Miðbakkann þar sem framvegis verði „lögð áhersla á samspil milli hafnar, borgar og borgarbúa.“. Ungir listamenn hafa málað svæðið og ýmis tímabundin verkefni hafa verið sett upp, til að mynda hjólabrettavöllur, hjólaleikvöllur, körfuboltavöllur og matartorg með matarvögnum.
Í tilefni af þessu hefur verið skipulögð hátíðardagskrá á morgun, föstudaginn 12. júlí, frá klukkan 16 til 18.
Kl. 16:00 DJ Dóra Júlía spilar tónlist.
Kl 16:15 Ávarp.
Kl. 16:30 atriði frá dansskóla Brynju Péturs.
Kl. 17:00 BMX Brós verða með atriði.
Kl. 18:00 Viðburði lýkur.
Þá verður Dr. Bæk á svæðinu og býður hann reiðhjólaeigendum að koma með hjólin sín í fría ástandsskoðun.
Í sumar verður boðið upp á ýmsa viðburði á svæðinu má þar nefna fyrstu Götubita hátíðina á Íslandi (Street Food Festival) þann 19.-21. júlí n.k. Hátíðin mun samanstanda af mismunandi söluaðilum þar sem götubiti verður seldur í gámum, matvögnum og tjöldum. Einnig verða básar fyrir pop up verlsanir, bar, kaffisölu og matarmarkað ásamt öðrum nýjungum. Boðið verður uppá lifandi tónlist og önnur skemmtiatriði.
Reykjavíkurborg opnar einnig á Miðbakkanum fyrsta umferðargarðinn á Höfuðborgarsvæðinu sem er ætlaður ungum vegfarendum og þeirra uppalendum til að þjálfa hjólafærni. Frábær leið fyrir hjólandi vegfarendur á öllum aldri að læra og deila saman góðri hjólamenningu.