Lögreglan í Jakarta hefur verið að handtaka ungmenni sem hafa reynt að komast í vímu með því að sjóða dömubindi og drekka vökvann.
Lögregluyfirvöld í Jakarta, höfuðborg Indónesíu, hafa komist að því að ungmenni borgarinnar hafi tekið upp á nýstárlegum leiðum til að komast í vímu. Ein þeirra er að sjóða dömubindi.
Í umfjöllun Straits Times segir að ungmennin taki dömubindi, notuð jafnt sem ónotuð, og sjóði í klukkutíma eða þar um bil. Vökvinn er síðan kældur og drukkinn. Áhrifin munu vera ofskynjanir og tilfinningin að fljúga. Segir að lögreglan í Jakarta sem og víðar á vesturhluta eyjarinnar Jövu hafi handtekið ungmenni sem reynt hafi að komast í vímu með þessum hætti. Hins vegar liggja engin viðurlög við neyslu dömubindasafa.
Vice fjallar einnig um málið og segir að heilbrigðisyfirvöld í Indónesíu rannsaki hvaða efni í dömubindunum það er sem valdi eitrunaráhrifunum. Þetta sé þó ekki nýtt af nálinni, áður fyrr sniffuðu ungmennin lím og önnur spilliefni en fyrst hafi borið á þessu fyrir tveimur árum.