Í þessum þætti verður fyrst fjallað um heilaran og kraftaverkamanninn Santo Custodio sem bjó í litlu þorpi í Andalúsíu, skammt frá bænum Alcalá la Real þar sem þeir Jón Sigurður og Rucio búa núna. Sagan segir að hann hafi haft lækningarmátt á við þann sem við þekkjum af Jesúsögunum. Fræg er sagan þegar hann læknaði lamaðan dreng sem leitaði á náðir hans og eins sögurnar af því hvernig hann beitti mætti sínum til að snúa á lögreglumenn sem komnir voru til að handtaka hann. Heimamenn segja hann enn að stöfum þrátt fyrir að hafa fallið frá árið 1961 og segir Jón Sigurður af reynslu sinni af þeim störfum.
Svo verður fjallað um Khaled sem kom frá Alsír og lagði Frakkland að fótum sér með hinni svökölluðu rai-tónlist. Sú tónlistarstefna er ekki ný þó Evrópubúa hafi nýverið kynnst henni, en hin hugrakka Cheika Ramitti söng þessa tónlist í áratugi og var jafnan kölluð rai-drottningin. Hún ögraði sínu fólki verulega og þá ekki síst þegar hún flutti lag þar sem hún hvatti ungar konur til að vera ekkert að geyma meyjarblómið heldur drífa sig í því að fara að stunda kynlíf. Þetta lætur kannski ágætlega í eyrum kynlífsfræðinga í dag en samfélagið í Alsír var ekki tilbúið fyrir svona fagnaðarerindi. Einnig koma við sögu heimspekingurinn Albert Camus, sem fæddist og bjó í Alsír allt frammá þrítugs aldur, en var gagnrýndur fyrir að taka ekki þátt í sjálfsstæðisbaráttu þeirra gegn Frökkum.