Í dag munu þeir Jón Sigurður og Rucio ræða um algjört tilgangsleysi markmiða en þeir hallast helst að því að þessir skrifræðisherrar, sem sífellt eru að biðja þig um að útlista markmið, hafi það eitt að markmiði að halda þér uppteknum við markleysu svo þú farir ekki að gera neitt sem einhverju máli skiptir. Færa þeir fyrir því rök að markmið hafi frá öndverður verið hið mesta axarskaft og í grísku harmleikjunum voru það einmitt markmiðin sem færðu fólkinu hörmungarnar.
Svo verður fjallað um frægasta tangó í heimi, það er lagið La cumparsita, en stef úr því kemur uppí kollinn á þér um leið og minnst er á tangó. Svo mikill styr stóð um það að segja má að menningarleg milliríkjadeila hafi hlotist af. Höfundur þess seldi lagið fyrir 20 pesósa en náði samt að græða á því meðan meðhöfundar hans vilja meina að hann hafi svikið þá. Þeir félagar, Jón Sigurður og Rucio, láta ekki sitt eftir liggja og flytja lagið fyrir hlustendur, enda þekktir fyrir gítarleik og söng í spænskum sveitum.