Það þarf hugrekki til að pakka saman heilli fjölskyldu og fyrirtæki og flytja til Spánar.
Það má segja að ævintýraþráin hafi rekið Birtu og Nonna á nýjar slóðir, börnin þeirra tvö, Stormur Björn og Ylva Vár, fóru að sjálfsögðu með og gamli hamsturinn þeirra. Nú eru sex ár liðin síðan fjölskyldan sigldi með fullan bíl af búslóð á vit sólríkra ævintýra og lífið er svo ljúft í furuskóginum þar sem þau búa á Spáni að þau eru ekkert á leiðinni heim.
Birta er enn þá að hanna og sauma föt, mála og nú það nýjasta, að gera upp hús ásamt eiginmanni sínum sem er húðflúrlistamaður og þúsundþjalasmiður. Blaðamaður heyrði í Birtu og fékk að heyra meira um lífið í sólinni á Spáni.
„Við vorum búin að hugsa um að flytja erlendis í mörg ár, okkur langaði að prófa eitthvað nýtt og vorum með ævintýraþrá, vissum bara ekki hvert. Sérstaklega þegar sólin hafði varla sést í marga mánuði í skammdeginu, þá spurðum við hvort annað hvað við værum eiginlega að gera á Íslandi?“
Búa í furuskógi umkringd íkornum og uglum
Birta segir að lífið á Spáni sé ótrúlega gott, upphaflega hafi þau bara ætlað að búa úti í 1-2 ár en árin eru nú orðin sex! „Við búum, má segja, í miðjum furuskógi með náttúruna fyrir utan hjá okkur, það fylgir því mikil kyrrð og ró. Við erum mikið náttúru- og dýrafólk og það hentar okkur öllum mjög vel að vera hér. Við erum með mörg dýr á heimilinu og allt í kringum okkur er mikið líf, það eru íkornarnir í trjánum, uglur „húandi“ á nóttunni og jafnvel villisvínin sem eru bröltandi á götunum.
Lífið er afar þægilegt og stresslaust. Krakkarnir eru í skóla rétt hjá og eru altalandi á bæði katalónsku og spænsku.“
Lífið er afar þægilegt og stresslaust.
Hún segir að það sé yndislegt að vakna allan ársins hring í birtu og heitu lofti.
„Lífið hér er mikið utandyra og félagslega er það töluvert öðruvísi en heima á fróni. Veislur og matarboð fara fram utandyra mestan hluta ársins og börnin eru alltaf með. En án efa söknum við samt oft Íslands og hvað lífið er einfalt heima, sérstaklega tungumálalega séð því það eru töluð tvö tungumál í Katalóníu og nóg sem þarf að læra til að geta bjargað sér.
Þótt við séum sæmileg í spænskunni þá getum við takmarkað tekið þátt í djúpum matarboðsumræðum.
Við erum búin að eignast marga góða vini hér úti, bæði Katalóna og fólk frá öðrum löndum. Megnið af okkar vinum eru þó útlendingar sem eru í svipaðri stöðu og við. Fólk sem hefur búið í Barcelona eða sveitinni í kring í mörg ár. Spænsku vinirnir okkar hafa valist meira eftir enskukunnáttu því þótt við séum sæmileg í spænskunni þá getum við takmarkað tekið þátt í djúpum matarboðsumræðum. Loksins þegar maður er búinn að setja saman skemmtilegt svar við einhverju er löngu búið að skipta um umræðuefni,“ segir hún og hlær sínum smitandi hlátri.
Ný og spennandi verkefni fram undan
Birta var áberandi í tískuheiminum hér heima og segist hafa í mörgu að snúast á Spáni. Hún er enn þá að hanna og sauma föt undir eigin merki, By Birta, og selur bæði á íslenskan og erlendan markað. Það vita eflaust ekki allir að Birta er líka mjög fær með pensilinn.
„Ég er að mála portrait-myndir en síðustu tvö ár hefur tíminn minn samt aðallega farið á að gera upp húsið okkar. Það eru nú samt breytingar í vændum því við erum að fara af stað með nýtt verkefni sem felur í sér að kaupa hús hér úti, gera þau upp og selja. Ég get eiginlega sagt það að innanhússhönnun eigi allan hug minn þessa dagana og get ég ekki beðið með að henda mér í drullugallann, rífa út gamlar innréttingar, gera upp og smíða nýtt fínirí,“ útskýrir hún spennt og bætir við að hennar verksvið muni að mestu snúast um hönnunina og handverkið en undanfarið hefur hún æ meira verið að gera hlutina sjálf og viðurinn heillar hana sérstaklega.
„Ég elska að vinna hluti úr tré,“ segir hún alsæl í sólinni á Spáni.
Fleiri myndir af fallega húsinu þeirra og allt viðtalið við Birtu má lesa í jólablaði Húsa og híbýla sem fæst á sölustöðum til 13. desember.
Myndir / Birta Björnsdóttir
