Hollendingurinn og grafíski hönnuðurinn Theo-Bert Pot heldur úti vefsíðunni The Nice Stuff Collector þar sem hann fjallar meðal annars um hönnuði og segir frá og sýnir myndir af heimili sínu sem er algjörlega einstakt og veitir mikinn innblástur.
Vefsíðuna opnaði hann sem viðbót við Instagram-síðu sína sem hlotið hafði mikil og góð viðbrögð. Hann hefur einnig mikla ástríðu fyrir ljósmyndun og tekur allar myndir sjálfur. Á heimili hans er að finna fallega hluti og húsgögn frá þekktustu hönnuðum heims, hann er djarfur í litavali og óhræddur við að fara eigin leiðir.
Í kjölfarið birtist heimilið hans meðal annars í Elle Decoration UK, Elle Decoration French og Rum Hemma. Hann hefur einnig komið fram í sjónvarpsþáttum og haldið fyrirlestra um hönnun, stíl og litaval og samspil þess við samfélagsmiðla.
Hann hefur unnið með mörgum hönnuðum og fyrirtækjum og er stofnandi og annar meðeigandi grafíska hönnunarstúdíósins Pot & van der Velden.
Síðan er á hollensku en myndirnar tala sínu máli og gott betur en það. Sjón er sögu ríkari.