Nú þegar flestir dvelja heima við eru margir farnir að huga að því hvernig hægt er að breyta og bæta heimilið og gera það huggulegra en áður. Ekki er alltaf nauðsynlegt að fara í stórvægilegar breytingar en hér eru nokkur lítil atriði sem geta skipt sköpum.
Góður ilmur
Upplifun okkar á rýmum einskorðast ekki aðeins við hið sjónræna. Hljóð og lykt skiptir einnig miklu máli og eru minningar okkar margar hverjar tengdar lykt. Ilmkerti og ilmolíulampar með hreinum ilmkjarnaolíum geta bætt andlega heilsu og gert andrúmsloftið á heimilinu betra.
Litríkur textíll
Litir eru vel til þess fallnir að lífga upp á tilveruna. Fallegir púðar og teppi í uppáhaldslitunum þínum geta sannarlega bætt andann. Efnisvalið skiptir hér öllu máli en náttúrleg efni geta gefið rýminu meiri dýpt og gert stemninguna enn betri.
Blóm og pottaplöntur
Ef einhvern tímann er rétti tíminn til að kaupa blóm og pottaplöntur inn á heimilið þá er það núna. Að færa náttúruna inn á heimilið gefur góða raun en fjölda margar rannsóknir benda til þess að blóm og plöntur hafi róandi áhrif og bæti loftgæði. Prófaðu líka að setja afskorin blóm í lítinn vasa á náttborðið. Það er gott og hressandi að byrja daginn á að sjá falleg blóm og notalegt að enda hann á þeim nótum líka. Já, blóm geta svo sannarlega gert kraftaverk!
Röð og regla
Reyndu eftir fremsta megni að hafa heimilið í röð og reglu. Þegar aðrir álagsþættir vega þungt líkt og á tímum sem þessum skiptir gríðarlegu máli að skipulag heimilisins sé gott. Nýttu tímann til að grisja og gefðu frá þér hluti sem þú notar ekki lengur. Ofhlaðin rými geta skapað streitu og látið okkur líða eins og við höfum litla sem enga stjórn á hlutunum. Taktu líka til í skápum og skúffum og komdu skipulaginu í lag þar og umgengnin á heimilinu verður auðveldari. Síðast en ekki síst: Komdu þér upp góðri rútínu. Það skiptir máli að byrja daginn vel. Litlir hlutir eins og að búa alltaf um rúmið á morgnana setur tóninn fyrir daginn. Röð og regla gerir verkefni dagsins auðveldari að fást við.
Loftaðu út
Ein helsta ástæða mygluvanda er of lítil loftun. Líkleg skýring er að margir eru fjarri heimilum sínum stóran hluta dagsins við vinnu og í skóla og loka gluggum áður en farið er út af heimilinu. Nú þegar flestir eru heima er gott að nýta tækfærið og venja sig á að lofta vel út en nauðsynlegt er að hreyfing komist á loftið til að hindra óæskilega rakasöfnun. Í húsum þar sem er gólfhiti er sérlega mikilvægt að regluleg hreyfing sé á loftinu en einnig er gott fyrir andlega og líkamlega líðan að opna reglulega út og hleypa fersku lofti inn en staðið loft getur aukið slen.
