Hinn hugmyndaríki Hans J. Wegner hafði þægindi og nýstárleika að leiðarljósi við hönnun sína.
Danski húsgagnahönnuðurinn Hans J. Wegner hannaði Flag Halyard PP225-stólinn árið 1950, sem framleiddur er af PP Møbler. Sagt er að hugmyndin að stólnum hafi kviknað þegar Wegner sat á ströndinni ásamt börnum sínum sem voru að leik í sjávarmálinu. Wegner kom sér kyrfilega fyrir í sandinum og mótaði úr honum sæti sem hann raungerði síðar í Halyard-stólinn.
Stóllinn er gerður úr stáli og 240 metrum af svokölluðu dragreipi, sem ofið er úr náttúrulegum hör, sem nafnið á stólnum vísar til en dragreipi er notað til þess að draga upp fána og segl.
Form stólsins er frumlegt og hefur talist til einkar framúrstefnulegrar hönnunar á þeim tíma. Stóllinn hefur hreinar línur og einföld form sem mynda skemmtilegar andstæður við annars hrátt efnisvalið. Stóllinn kemur með höfuðpúða úr leðri eða lituðum segldúk og sauðskinni á setu, sem framleitt er á Íslandi. Andstæður Wegners í efnisvali sýna hvers megnugur hann var til þess að hanna nýstárleg, hagnýt og þægileg húsgögn úr hvaða efni sem er.
Í Design Museum Danmark, sem staðsett er í Kaupmannahöfn, stendur yfir sýningin The Danish Chair an International Affair þar sem berja má stólinn augum innan um aðra stóla úr heimi danskrar hönnunar.
Texti / María Erla Kjartansdóttir