Hvert húsgagn sem framleitt er af Carl Hansen & Søn á sér sérstaka sögu og er legubekkurinn BM0865 eftir Børge Mogensen þar engin undantekning. Hann kom fyrst fram á sjónarsviðið árið 1958 en nú hefur framleiðslan hafist aftur.
Bekkurinn er fyrst og fremst hannaður með þægindi í fyrirrúmi en samspil forms og efnisvals er athyglisvert. Formið er einfalt og stílhreint en býr þó yfir töluverðri vigt. Efnisvalið gefur bekknum léttara yfirbragð en hann er smíðaður úr gegnheilli FSC-vottaðri eik og sessurnar úr ólituðu strigaefni.
Mogensen vildi að útlit húsgagnsins myndi endurspegla tilgang þess, að skapa rólegt andrúmsloft þar sem hægt er að slappa af eftir erilsaman dag og má með sanni segja að honum hafi tekist afar vel til. Útlínurnar eru ávalar sem gefa fágað og afslappað útlit í senn.
Bekkurinn hentar vel í hvaða rými sem er en hægt er að hafa hann einan og sér eða setja nokkra bekki saman og þannig mynda nokkurs konar setustofu. Hægt er að bæta við bakpúðum og höfuðpúðum allt eftir óskum hvers og eins. Legubekkurinn er tímalaus hönnun sem ber þekkingu Mogensens fagurt vitni.