Í samkomubanninu felast svo sannarlega tækifæri en á tímum sem þessum er tilvalið að líta inn á við. Endurskipulagning heimilisins er eitthvað sem margir hafa látið sitja á hakanum en nú er tíminn!
Bókin This is home – The Art of Simple Living er því tilvalinn lestur. Þar er fjallað um 15 ólík heimili ásamt viðtölum við fólk þar sem leitast er við að svara spurningum um hvað það er sem gerir okkur hamingjusöm heimavið. Einnig er fjallað um hvernig innanhússhönnun getur aukið vellíðan.
Undanfarin ár hefur áherslan í innanhússhönnun verið á persónlegan stíl og hvernig hver og einn getur fundið hann hjá sér en í bókinni er að finna ýmis góð ráð. Um tvöhundruð litmyndir prýða blaðsíðurnar en einnig eru sýnd dæmi um hvernig hægt er að fegra heimilið á einfaldan hátt. Bókin skiptist í tíu ólíka kafla þar sem fyrsti kaflinn fjallar um það hvernig hægt er að finna sinn persónulega stíl. Annar kaflinn fjallar um hvernig hægt er að segja skilið við fortíðina og einblína á þá manneskju sem lesandinn er í dag ásamt því að kennt er hvernig á að grisja á heimilinu.
Í þriðja kafla eru gefin ráð um hvernig hægt sé að spara við val á innanstokksmunum og gera greinarmun á þörfum og óþarfa út frá þeim gildum sem kennd eru í bókinni. Kaflar fjögur og fimm fjalla um hvernig hægt er að nýta sköpunarkraftinn og hvernig hægt er að finna ódýrar og sniðugar lausnir til að gera breytingar á heimilinu ásamt því að sýna hvernig best er að finna gott jafnvægi.
Sjötti og sjöundi kaflar fjalla síðan um umhverfið og landslagið, þá umhverfisþætti sem taka þarf tillit til þegar rými eru innréttuð. Lífsstíll íbúanna skiptir þar einnig gríðarlegu máli en góð hönnun þarf að uppfylla ákveðnar þarfir og væntingar til að geta talist góð hönnun. Í síðasta kaflanum eru gefin góð ráð um það hvernig hægt er að viðhalda fallegu heimili og halda því fersku án of mikillar fyrirhafnar. Að lokum er svo samantekt. Þessi bók er því tilvalin fyrir alla þá sem vilja einfalda líf sitt og endurskipuleggja heimilið á nýju ári. Bókin fæst á Amazon.
