Við fengum skapandi einstaklinga til þess að útbúa einfalda skreytingu þar sem náttúran er höfð í forgrunni. Möguleikarnir eru endalausir og útkoman eftir því.
Iona Sjöfn Huntingdon-Williams er 29 ára og útskrifaðist sem grafískur hönnuður frá Listaháskóla Íslands árið 2016. Hún starfar sem grafískur hönnuður hjá japanska fatarisanum UNIQLO í Skandinavíu og er búsett í Kaupmannahöfn.
Segðu aðeins frá þér sem hönnuði. „Grafísk hönnun er mjög fjölbreytileg, í grunninn er hún myndræn miðlun á upplýsingum. Sem grafískur hönnuður vinn ég aðallega við mörkun. Mörkun eða „branding“ á ensku er að túlka rödd/áherslu fyrirtækja og einstaklinga og setja það fram með fallegri sjónrænni miðlun. Ég starfa sem grafískur hönnuður fyrir japanska fyrirtækið UNIQLO í Skandinavíu. UNIQLO er til þess að gera nýtt fyrirtæki á skandinavíska markaðnum og tekst ég á við mörg krefjandi og skemmtileg verkefni. Í frítímanum mínum er ég að vinna að nokkrum persónulegum verkefnum. Verkefnin munu líta dagsins ljós seinni hluta þessa árs eða í byrjun ársins 2021. Ég tel það mjög mikilvægt fyrir alla að nýta frítíma sinn í eitthvað sem veitir gleði og reynir á sköpunarkraftinn á einhvern hátt.“
Segðu okkur frá hugmyndinni á bak við skreytinguna. „Hugmyndin á bak við skreytinguna er að færa náttúruna inn á heimilið þá með greinum úr garðinum og litlum fuglum en þá verður þessi einfalda skreyting til. Fuglarnir eru búnir til úr þunnum spæni sem ég beygði til og skar síðan út. Einföld og falleg skreyting sem minnir fólk á bjartari og sólríkari tíma fram undan.“
