- Auglýsing -
Vetrarhátíð verður formlega sett þann 6. febrúar næstkomandi en markmið hátíðarinnar er að lýsa upp skammdegið með viðburðum og uppákomum af ýmsu tagi og mun fjöldi listamanna taka þátt. Hátíðin samanstendur af ljóslistaverkum, Safnanótt og Sundlauganótt og fer fram í öllum sex sveitarfélögum höfuðborgarsvæðisins.
Margir skemmtilegir viðburðir eru á dagskrá hátíðarinnar og mun Guðmundur Oddur Guðmundsson, Goddur, halda fyrirlestur í Hönnunarsafni Íslands við Garðatorg þann 7. febrúar nk. kl. 20 og er viðburðurinn hluti af dagskrá Safnanætur.
Fyrirlesturinn heldur Goddur í tengslum við rannsóknarverkefnið, Íslensk myndmálssaga, sem nú hefur aðsetur í Hönnunarsafni Íslands. Um fyrirlesturinn segir: „Sköpunarverk mannsins og hugmyndir ferðast eins og rekaviður, veltast um en eru ekki eins frumlegar og margur heldur. Hugmyndin er sú sama en útfærslan breytist á leiðinni eftir persónuleikum, staðbundnum efnivið og verkþekkingu.“
Hægt er að kynna sér dagskrá Vetrarhátíðar betur hér.