Undirbúningur fyrir opnun sýningarinnar Chromo Sapiens eftir Hrafnhildi Arnardóttur / Shoplifter er í fullum gangi. Sýningin verður opnuð á morgun, fimmtudaginn 23. janúar kl. 20.00 í Hafnarhúsinu.
Hljómsveitin HAM, sem gerði tónverk sem hljómar í verkinu, mun koma fram á opnuninni.
Verkið Chromo Sapiens, sem var framlag Íslands á Feneyjatvíæringnum 2019, er þakið miklu magni af einkennisefniviði Hrafnhildar; gervihári. Litir, hljóð og aðlaðandi áferð leiða gesti í gegnum þrjú ólík rými; Primal Opus, Astral Gloria og Opium Natura, sem umlykja þá í myndrænum og hljóðrænum samruna.
Listsköpun Hrafnhildar liggur á mörkum myndlistar, gjörninga og tísku og sækir hún innblástur í dægurmenningu og fjöldaframleiðslu, auk alþýðulistar og handverkssögu en húmor gegnir einnig stóru hlutverki.
Hár hefur verið hennar aðalviðfangsefni á undanförnum árum þar sem hún kannar notkun þess, táknrænt eðli og sjónræna og listræna möguleika þessarar líkamlegu afurðar og hvernig upplifa megi hár sem birtingarmynd sköpunar í nútímamenningu og samfélagi.
Sýningin stendur yfir í Hafnarhúsinu frá og með 23. janúar n.k. til 22. mars 2020.