Tom Dixon hannar vörulínu úr korki

Breski hönnuðurinn Tom Dixon hefur sett á markað röð húsgagna úr korki. Línan inniheldur hillur, stól og þrjú borð. Húsgögnin hafa ávalar línur og fær korkurinn að njóta sín en húsgögnin koma í djúpbrúnum lit.

Korkur er náttúrulegt efni og endurvinnanlegt, hann er vatnsheldur, eldheldur og slitsterkur en korkur hefur lengi verið notaður við framleiðslu á skóm, gólfefnum og veggklæðningum.

Efnið er jafnframt það umhverfisvænasta sem fyrirfinnst þar sem tré eru ekki höggvin fyrir framleiðslu á korki heldur er hann í raun trjábörkur sem skafinn er utan af trénu. Tréð lifir svo góðu lífi, heldur áfram að vaxa og myndar nýjan börk. Eftir ákveðin tíma er svo hægt að skafa aftur af sama trénu. Sala á línu Dixon hófst nú í lok mars.