Ritstjórn Hús og híbýla hefur í gegnum tíðina fengið skapandi fólk til að hanna einhvers konar „jólakúlu“ eða skraut á tré. Heiðdís Inga Hilmarsdóttir, vöruhönnuður frá Listaháskóla Íslands, notaði vægast sagt óvenjulegt hráefni í sína kúlu.
Hver er hugmyndin að baki hönnuninni?
„Hugmyndin er að nýta hráefni sem annars fara til spillis og enda í ruslinu. Í mínum verkefnum hef ég einblínt mikið á ferli og hvernig og úr hverju hlutir í kringum okkur eru búnir til.“
Hvaða leiðir voru farnar hvað varðar efnisval og formfræði?
„Það má segja að hundurinn minn, Stormur, hafi veitt mér innblásturinn hvað varðar efnisval. Eins og margir aðrir ferfætlingar fer hann vel úr hárum og reglulega þarf ég að kemba honum. Eftir slíkar athafnir sit ég uppi með uppsafnaða „hundaull“ og því ákvað ég að fara í tilraunastarfsemi með hráefni, þæfingu og mótun forma. Hvað varðar formfræði þá lék ég mér með geometrísk form í svona náttúrulegu efni.“
Hvað kemur þér í jólaskap?
„Mandarínur.“
Hvað er ómissandi yfir hátíðirnar?
„Það er ómissandi að gefa sér tíma. Ég er að reyna að venja mig af því að pakka inn gjöfum korter í 6 á aðfangadag.“
Texti / Elín Bríta
Myndir / Heiðdís Guðbjörg Gunnarsdóttir