Andri Snær Magnason hæðist að samfélagsmiðlum Zuckerbergs og spyr hvernig hægt sé að senda honum afsal af húsinu.
Undanfarna viku hafa notendur Facebook á Íslandi dreyft keðjubréfi sem fyrst kom fram á sjónarsviðið fyrir nokkrum árum. Þar kemur ranglega fram að Facebook ætli sér von bráðar að eignast allar ljósmyndir notenda Facebook og tekur fólkið sem birtir færsluna, það fram að það gefi Mark Zuckerberg ekki leyfi til að eignast ljósmyndir þeirra. Þetta er sem sagt húmbúkk.
Andri Snær Magnason rithöfundur skrifaði spaugilega færslu á Facebook í fyrradag sem slegið hefur rækilega í gegn. Gerir hann stólpagrín að Facebook og þeirri heimild sem við notendur gefum fyrirtæki Zuckerbergs til að njósna um okkur og nýta efni okkar og neysluvenjur til að selja til þriðja aðila. „Ég geri mér grein fyrir að Facebook kortleggur skoðanir mínar, neysluvenjur, sköpunargáfu mína og tengslanet og nýtir í sína þágu,“ segir Andri Snær og heldur áfram: „Ég held hér úti fréttabréfi um líf mitt launalaust og pósta hér ljósmyndum sem Facebook hagnast á, ég reyni að pósta áhugaverðum hlutum til að fá læk/áhorf og auka auglýsingatekjur fyrirtækisins sem veikir íslenska fjölmiðlun og bóklestur en eykur upplýsingaóreiðu og klofning í samfélaginu.“ Þá segist hann einnig gera sér grein fyrir því að fyrirtækið nýti sér efni hans, pósta sem og einkaskilaboð til að þjálfta gervigreind sem síðar mun stela starfi rithöfundarins. „Samt er ég hér í sjálfboðavinnu fyrir Zuckerberg að sá í akur óvinar míns. Hvernig sendir maður honum afsal af húsinu?“
Færsluna má lesa hér að neðan: