Vélstjórinn fyrrverandi, Anna Kristjánsdóttir, hefur sett sér stór heilsumarkmið á árinu og segir hún átakið hefjast í dag. Hún er nú kominn aftur til síns heima, til eyjarinnar fögru Tenerife, og þar ætlar hún að komast niður í 72 kíló sem fyrst á árinu.
Frá markmiðum sínum greinir Anna í færslu á Facebook og til að losa sig við kílóin fer hún í átak í neyslu og hreyfingu frá og með deginum í dag. Við skulum grípa niður í færslu hennar:
„Ég veit samt ekki hvort það sé mjög ráðlegt fara á Stóru-Klif strax í upphafi, enda er ég í lélegu formi eins og er. Þá þarf ég að fara í ökuferð til tannsa eins og áður er getið, en svo verður það Litla-Klif en síðan er stefnt á Stóru-Klif í næstu viku, enda ætlunin að komast niður í 72 kg fyrir sumarsólstöður. Ekki veitir af eftir óhóf jólanna,“ segir Anna og bætir við:
„En sjáum til hvað setur. Svo veit ég um konu eina í næsta húsi sem mun reka mig áfram og hæðast að mér ef ég stend mig ekki í stykkinu í átaki ársins. Þetta fer að vera full vinna hjá mér, klukkutími á dag í Duolingo og ganga í tvo tíma á dag og allt fært til bókar, síðan eftirlit með hlutabréfamarkaðnum því ekki veitir af að passa vel upp á aurana sína svo ég geti haldið áfram að ferðast á SagaClass. Hvernig á ég að hafa tíma til að detta í það?“