Anna saknar Íslands gríðarlega: „Hver vill bjóða mér heim um jól og áramót?“

Anna Krstjánsdóttir er með „bullandi heimþrá“ og leitar að heimboði um jól og árámót.

Vélstjórinn og húmoristinn Anna Kristjánsdóttir segist í nýjustu dagbókarfærslu sinni sem hún birtir á Facebook, að hún sé komin með mikla heimþrá og vilji koma til Íslands um hátíðarnar. Í byrjun færslunnar talar hún um þann fjölda Íslendinga sem flykkjast nú til Tenerife yfir Jólin en sjálf gæti hún ekki hugsað sér að fara viljandi að heiman á þessum tíma.

„Annars skil ég ekkert i þessum Íslendingum. Ég gæti ekki hugsað mér að fara viljandi að heiman á jólum til að eyða þeim á sólarströnd. Ég man sjálf hve ég var oft einmana og með heimþrá á jólum þegar ég var til sjós eða búsett erlendis.“ Þetta segir Anna áður en hún rifjar upp þegar hún fór fyrir hönd Íslendingafélagsins í Stokkhólmni á sýningu kvikmyndar Friðriks Þórs Friðrikssonar, Börn náttúrunnar. Myndin varð til þess að Anna fékk heiftarlega heimþrá.

„Einu sinni endur fyrir löngu var ég í menningarnefnd Landssambands Íslendingafélaga í Svíþjóð fyrir hönd Íslendingafélagsins í Stokkhólmi og það átti að sýna kvikmynd Friðriks Þórs Friðrikssonar, Börn náttúrunnar, í bíó í borginni. Menningarfulltrúi Íslendingafélagsins fékk að sjálfsögðu senda boðsmiða á frumsýninguna og bauð Birnu vinkonu minni með mér á sýninguna. Í myndinni kemur fyrir atriði þar sem Hrafnista, hvar móðir mín heitin vann í eldhúsinu í mörg ár þegar ég var á barnsaldri, er sýnd böðuð jólaljósum og ég fékk slíka bullandi heimþrá að ég flýtti mér að kaupa farmiða til Íslands eftir sýninguna. Hafði ég þá ekki komið til Íslands í meira en fjögur ár.“

Börn náttúrunnar var síðan sýnd á RÚV í gær og Anna fékk aftur heimþráarkast.

„Í gærkvöldi var Börn náttúrunnar sýnd í sjónvarpinu. Af hverju hafði ég ekki rænu á því að slökkva á sjónvarpinu áður en atriðið með Hrafnistu kom í myndinni? Nú sit ég aftur uppi með bullandi heimþrá þegar sjöttu jólin mín hér á útnára Evrópusambandsins nálgast.

Hver vill bjóða mér heim um jól og áramót?“