Tónlistarmaðurinn Auðunn Lúthersson gefur nú út sitt þriðja lag undir nafninu Luthersson. Lagið Stockholm Syndrome fjallar um Stokkhólmsheilkennið í samhengi við lok ástarsambands, hugmyndina um persónulegt frelsi og að vera tilfinningalega háður einstaklingi. Þetta kemur fram í fréttatilkynningu frá tónlistarmanninum.
Lagið samdi Auðunn ásamt breska tónlistarmanninum Matthew Harris, einnig þekktur sem twoswords sem er nú á tónleikaferðalagi. Auðunn býr nú í Los Angeles og starfar þar við lagasmíðar og hljóðupptökur. Auðunn spilar á gítar, hljóðgervla og syngur en Högni Egilsson kenndur við Hjaltalín spilar á píanó.
„Þegar ég er að semja tónlist þá er ég fyrst og fremst að reyna koma einhverjum sannleika frá mér. Tónlistin er tærasta listformið og því nauðsynlegt að losna undan allri tilgerð og reyna að opna hjartað,“ segir Auðunn.
Ásamt því að gefa út sitt eigið efni hefur Auðunn unnið með tónlistarfólki á borð við japönsku söngkonunni Chichi, Jite, Ysa, ástralska kvenkyns rapparanum Adelina og hinum Senegalska Prince Ndour.
Lagið er hljóðblandað af Edward Liu og masterað af Glenn Schick.
Ljósmyndina fyrir útgáfuna vann Auðunn með Óla Guðbjartssyni og Gianni Gallant.
Lagið má finna hér.